2015 سالات ودخلات 2016 وباينة داخلا بعجاجتها مع قلة الأمطار ونية الحكومة
رفع الدعم على بعض المواد الأولية... لكن راه حتى ألفاين وخمسطاعش دازت بي براكتها
وداز أغلبها كوارث وحدة تنسيك في وحدة ، بالنسبة لسياسيين ديالنا كاين لي گهمو
الشكلاط وكاين لي دار الدمج بين وزارتين فوق سرير واحد، وكاين لي رد المكتب ديالو
برتوش ، وكاين لي لفرونسي عندو كلير، كاين لي شوهاتو كراطة، وكاين مسكين لي من
كثرت حبو للعمل كيخدم 22 ساعة ، كاين لي ساهم في رفع قيمة العملة حتى ولات 2 فرنك
كتساوي 8000 درهم، وكاين لي شتت الشمل لمهابيل ملي سد بويا عومار. وكاين مسكين لي
داه الواد كل واحد وفين جاتو الدقة لكن الدقة لي جات لشعب مابحالها دقة. كاين لمات
في فيضانات الجنوب أو تشرد وحتى حد متسوقو، وكاين لي ماتو ليه وليداتو محروقين في
كار ديال طانطان أو غارقين في بحر بوزنيقة، وكاين لي عودو لوليداتو الباك حيث
المسؤولين سربوه، وكاين لي هز الشمع ومشا إزور الوالي الصالح بويا أمانديس. وكاين
لي قال دخل رمضان والقضية غادة وتزيان لكن جا فار وخسر لبلان لشي وحدين كانو
لاعبين الكارطة في أهم ليلة في العام. وكاين لي تفرج في الزين لي فيه في السر و
لعنو في العلن، وكاين لي ظهرو طاب بالسوط ديال إرتفاع الأسعار وتزيزن لسانو على
لكلام ، وكاين لي فقد أعز حبابو في الحج وعيشاتو الحكومة في الوهم الكاذب، وكاين
لي مقدو وسام زادوه جوج. وكاين لي رسل وليداتو لطب ماشي الكلية لكن
إداواو من بعد مكلاو لعصى ملي خرجو في المظاهرات... وكاين وكاين المهم الله إنجينا
وإنجيكم غير من الجايات أما العربون راه باين.
وإنجيكم غير من الجايات أما العربون راه باين.
نين بريس : عبدالعالي عطيف
ذكريات عبعال
ردحذف